O obxectivo principal desta publicación é presentar as posibilidades de construción con madeira estrutural e as calidades da mesma, sobre todo dende un punto de vista técnico; para que o seu coñecemento promova o aumento da demanda deste tipo de produtos e que, xunto coa competitividade de prezos por menor transporte e o aumento da concienciación sobre un consumo máis responsable, axude a xerar o establecemento de máis industria local para a fabricación de produtos técnicos de madeira con madeira de Galicia.
A publicación amosa vinte e unha obras galegas construídas con madeira nos últimos cinco anos (2017-2022), recoñecidas pola súa calidade arquitectónica, e nas que se empregou un sistema estutural de madeira de deseño innovador ou produtos estruturais de madeira innovadores en si mesmos.
 

Esta terceira edición reúne nove textos monográficos que desenvolven diversos aspectos sobre a madeira: a madeira como estratexia de sustentabilidade na edificación; o uso de fontes sostibles da madeira; propiedades da madeira; eliminar barreiras: as pantasmas da madeira; proxecto sismorresistente de estruturas de madeira; cálculo de estruturas de madeira; produtos técnicos de madeira para construción; experiencias construtivas e procedementos construtivos en madeira.

Os trece proxectos recollidos nesta publicación preséntanse como un pequeno expoñente da arquitectura galega en madeira. Sen dúbida existen moitos máis exemplos construídos pola nosa xeografía, non recollidos agora, que dende esta publicación queremos fomentar o descubrimento e posta en valor des mesmos.
Trátase pois dunha primeira aproximación, a través da madeira, a un conxunto de obras e arquitectos de probada calidade e compromiso coa profesión que exercen en Galicia, desde a que mirar con optimismo as amplas posibilidades arquitectónicas e construtivas deste material milenario tan cargado de futuro.

Para o contido específico de produtos de madeira, a guía está apoiada en normas harmonizadas e outros documentos. Abarca a definición de conceptos xerais e a explicación do procesamento pola vía CEN cando o marcado é obrigatorio e pola vía EOTA cando é voluntario, mencionando en cada caso diversos produtos de madeira para a construción coa correspondente especificación técnica harmonizada de aplicación.
Tamén contén fichas específicas para produtos de madeira con marcado CE obrigatorio, indicando as características esenciais e os Sistemas de Avaliación e Verificación de Prestacións que se van aplicar.

Esta ferramenta gratuíta para o cálculo estrutural estase a desenvolver no marco do convenio “Madeira en Valor” entre a Axencia Galega da Industria Forestal da Xunta de Galicia e a Universidade de Santiago de Compostela, a través da Plataforma de Enxeñaría da Madeira Estrutural (PEMADE).

É unha ferramenta en desenvolvemento. Na súa primeira versión, inclúe un módulo para o cálculo de vigas de forxado e, proximamemnte, poderán realizarse cálculos de cubertas.
 

A industria forestal-madeira en Galicia é un sector económico importante, que proporciona emprego, contribúe ao crecemento económico e xera ingresos a través da produción e comercialización de produtos forestais e transformados de madeira.