Casa San Vitorio, en Allariz
Ficha técnica
Juan Seara e Berta Peleteiro, Seara Peleteiro Arquitectos
Miguel Gallego Otero
Fátima Nieves Fernández
Jesús Buceta Hábitat S.L.
Allariz (Ourense)
2023
Brais Seara Fernández
Descrición
Os promotores da obra decidiron comezar unha nova vida no rural, abrazando todo aquelo que o entorno lles ofrecía, lonxe desa visión idealizada e romántica que moitos urbanitas teñen do que é a aldea.
Desfrutar do monte, dos camiños, da veciñanza. Desfrutar do inverno e do verán. Pero, sobre todo, desfrutar do espazo exterior. Querían unha casa que lles permitise vivir fóra da casa.
Esa vocación de expandir o ámbito doméstico máis aló dos muros que pechan as vivendas, esixía minimizar o programa funcional, maximizando as potencialidades de uso. Os arquitectos tiveron que articular o imprescindible, fuxindo dos típicos "por se acaso" que tenden a dar como resultado vivendas sobredimensionadas e infrautilizadas, nun exercicio de compactación que lles permitise desbloquear metros e exponxar unha proposta accesible e viable.
Ao mesmo tempo, a vivenda debía aproveitar todas as potencialidades da parcela, adaptándose ao contexto dun xeito respectuoso e sensible coa vexetación existente e coa pendente natural do terreo, pasando desapercibida desde a rúa.
Conxugar o criterio de accesibilidade dunha única planta, garantindo os accesos e minimizando os traballos de implantación levoulles a propoñer unha vivenda elevada, en estrutura palafítica, que permitise o aproveitamento dese intersticio como un gran espazo aberto, que sumados aos existentes no nivel superior, fai que case o 60% da superficie corresponda a espazos exteriores cubertos.
Tres módulos de 7x4 metros (dimensións condicionadas polo transporte dos entramados lixeiros de madeira), nunha disposición concéntrica e xirados 120º, conformando un espazo central triangular, permitiulles "abrazar" as árbores existentes e abrirse ás vistas lonxanas, aproveitando todas as orientacións e respectando os accesos peonil e rodado.
Dito esquema inicial, refórzase conformando un novo triángulo equilátero unindo os vértices alternos, arriostrando o conxunto e conformando uns corredores exteriores cubertos, tan habituais na arquitectura tradicional da comarca.
Unha casa lixeira, esencial e sostible, executada integramente en madeira e pousada sobre unha bandexa estrutural de formigón que permite salvar grandes luces, liberando o espazo inferior e minimizando os puntos de contacto co chan, pousándose, sen apenas deixar pegada.
PREMIOS E RECOÑECEMENTOS
Premio Gran de Area 2021
Información de Seara Peleteiro Arquitectos